حسينه يئرلر آغلار گؤيله ر آغلار
بتول و مصطفي پيغمبر آغلار
حسينون نوحه سين دلريش يازاندا
موسلمان سهلدير كه كافر آغلار
كور اولموش گؤزله رين قان دوتدو شومرون
كي گؤرسون اؤز الينده خنجر آغلار
حسينون كؤينه گي زهرا الينده
چكر قئيحا قيامت ، محشر آغلار
آتاندا حرمله ، اوخ كربلاده
گؤرئيدين دوشمن آغلار ، لشگر آغلار
قوجاغيندا ، گؤرئيدين ام ليلا
آليب نعش علي اكبر آغلار
رباب ، نيسگيل دؤشونده سود گؤره نده
علي اصغري ياد ائيله ر آغلار
باشيندا كاكل اكبر هواسي
يئل آغلار ، سنبل آغلار ، عنبر آغلار
يازاندا آل طاها نوحه سين من
قلم گؤردوم سيزيلدار ، دفتر آغلار
علي ، شق القمر ، محراب تيليت قان
قولاق وئر ، مسجيد اوخشار منبر آغلار
عليده ن شهريار ، سن بير اشاره
قوجاقلار قبري ، مالك اشتر آغلار
