|
سن ياريمين قاصدي سن
اگلش سنه چاي دئميشم
خياليني گؤندريب دي
بسكه من آخ – واي دئميشم
آخ! گئجه لر ياتماميشام
من سنه لاي لاي دئميشم
سن ياتالي، من گؤزومه
اولدوزلاري ساي دئميشم
هر كس سنه اولدوز دئيه
اؤزوم سنه آي دئميشم
سندن سؤنرا، حياته من
شيرين ديسه، زاي دئميشم
هر گؤزلدن بير گول آليب
سن گؤزه له پاي دئميشم
سنين گون تك باتماغيوي
آي باتانا تاي دئميشم
ايندي يايا قيش دئييرم
سابق قيشا، ياي دئميشم
گاه طويووي ياده ساليب
من ده لي، ناي - ناي دئميشم
سؤنرا يئنه ياسه باتيب
آغلاري هاي هاي دئميشم
اتك دولي دريا كيمي
گؤز ياشيما، چاي دئميشم
عمره سوره ن من قره گون
آخ دئميشم، واي دئميشم
|
