بوشلاييب دوغما ديارين، اوموب البته ياريندان
ال اوزوب هر نه واريندان
قورخماييب، شهريميزين قيشدا آمانسيز بورانيندان، نه قاريندان
گزير آواره تاپا، يانديريجي دردينه چاره، تاپابيلمير
چوخ سئوير عشقي باشيندان آتا، آمما آتا بيلمير
اووا باخ آووچي دالينجا قاچير، آمما چاتا بيلمير
ايش دونوب، ليلي توشوب چوللره مجنون سوراغيندا
شيرين الده تئشه، داغ پارچالايير فرهاد اوتورموش اوتاغيندا
تشنه لب قو نئچه گور جان وئري دريا قيراغيندا
گوزده حسرت يئريني خوشله ييب ابهام دوداغيندا
وارليغين سون اثري آز قالير ايتسين ياناغيندا
سانكي بير كوزدي بورونموش كوله وارليق اوجاغيندا
كوزه رير پيلته كيمين، ياغ توكه نيب دير چراغيندا
بوي آتير رنج باغيندا؛ قوجالير گنج چاغيندا،
بير آدامسيز، سوري آدلي، الي باغلي، ديلي باغلي!
سوري جان!
اومما فلكدن، فلكين يوخدو وفاسي،
نه قدر يوخدو وفاسي، او قدر چوخدو جفاسي،
كوهنه رقاصه كيمين، هر كسه بير جوردي اداسي،
او آياقدان دوشه ني، ايستير آياقدان سالان اولسون
او تالانميش لاري ايستير گونو- گوندن تالان اولسون
او آتيلميشلاري ايستير هاميدان چوخ آتان اولسون
او ساتيلميشلاري ايستير قول ائدركن ساتان اولسون
نئيله مك قورقو بوجوردور
فلكين نظمي ازلدن اولوب اضدادينه باغلي
قاراسيز آغلار اولانماز،
دره سيز داغلار اولانماز
اولو سوز ساغلار اولانماز
گره ك هر بير گوزه له بير دانا چيركين ده يارانسين،
بيري انسين يئره گوكدن، بيري عرشه اوجالانسين
بيري چالسين ال آياق غم دنيزينده،
بيري ساحيلده سئوينج ايله دايانسين
بيري ذلت پالازين باشه چكيب ياتسادا آنجاق،
بيري نين بختي اويانسين
بيري قويلانسادا نعمت لره يئرسيز،
بيري ده قانه بويانسين
آي آدامسيز سوري آدلي، ساچلاريندان دارا باغلي!
نئيله مك ايش بئله گلميش. چور گلنده گوله گلميش
فلكين ايري كمانينده اولان اوخ آتيلاندا دوزه دگميش،
ديلسيزين باغريني ده لميش
ايري قالميش، دوزو اگميش
اونو خوشلار بو فلك،
ائل ساراسين سئللر آپارسين،
بولبول حسرت چكه رك گول ثمرين يئللر آپارسين
قيسي چوللرده قويوب
ليلي ني محمللر آپارسين،
خسرووي شيرين ايلن ال اله وئرسين، كئفه دولسون،
سوري لار سولسادا سولسون،
بيري باش يولسادا يولسون،
سيقسا بير اولدوز اگر اولماسا اولدوزلار ايچينده،
بو سماء ظولمته باتماز
داش آتان، كول باشي قويموش،
داشيني اوزگه يه آتماز
سن يئتيش سون هدفه،
اوندا فلك مقصده چاتماز،
داها افسانه ياراتماز
سوري، اي باشي بلالي، زامانين قانلي غزالي
سوري بير قوش دي خزان آيري ساليبدير يوواسيندان،
ال اوزوبدور آتاسيندان،
جوجه دير حيف اولا سود گورمه ييب اصلا آناسيندان
او زليخا كيمي يوسف ايي ين آلمير لباسيندان
بونا قانع دي تنفس ائله يير يار هاواسيندا
درد وئرن درده ساليب آمما خبر يوخ داواسيندان
آغلاييب سيتقاياراق بهره آپارمير دوعاسيندان
او بير آئينه دي رسسام چكيب اوستونه زنگار،
اوندا يوخ قدرت گفتار،
اوزو چيركين، ديلي بيمار،
گنج وقتينده دل آزار،
گوره سن كيم دي خطاكار،
گوره سن كيم دي خطاكار!